Юстицин аслӑ канашҫине, Пӑрачкав районӗн прокурорӗнче ӗҫленӗ Алексей Галахова ҫӗнӗ должноҫ шанса панӑ. Кун пирки Чӑваш Енӗн прокуратури хыпарлать.
Раҫҫей тӗп прокурорӗн пуш уйӑхӗн 16-мӗшӗнче кӑларнӑ хушӑвӗпе килӗшӳллӗн малашне Улатӑрти районсен хушшинчи прокурорӗн тивӗҫне Алексей Галахов пурнӑҫласа пырӗ.
Палӑртса хӑвармалла, вӑл 1976 ҫулта Йӗпреҫ поселокӗнче ҫуралнӑ. И.Н. Ульянов ячӗпе хисепленекен Чӑваш патшалӑх университечӗн юридици факультетӗнче вӗреннӗ. Диплом илсенех ӑна 2001 ҫулта Йӗпреҫ районӗн прокуратурине следователь пулса ӗҫлеме йышӑннӑ. 2002 ҫултан пуҫласа кӑҫалхи пуш уйӑхӗн 16-мӗшӗччен вӑл Вӑрнар район прокурорӗн ҫумӗнче тата Пӑрачкав районӗн прокурорӗнче вӑй хунӑ.
Улатӑр район сучӗ пакунлӑ ҫынна 10 пин тенкӗ шыраса памалла тунӑ. Пӑтӑрмахӗ пӗлтӗрхи ҫуллах сиксе тухнӑ.
Улатӑр районӗнчи полицин пайӗн пуҫлӑхне пӗри митингра коррупципе ҫыхӑннӑ тесе ӳпкеленӗ. Хӑйне ҫавӑн пек кӳрентернине право хуралҫи питех те йывӑра илнӗ курӑнать. Ара, пустуй сӑмаха камӑн илтес килтӗр? Куҫа-куҫӑн тавлашнӑ чух та мар, митингра, 100 ытла ҫын умӗнче каланӑ. «Интерфакс-Поволжье» информаци агентстви пӗлтернӗ тӑрӑх, митингри видеона халӑх тетелне те вырнаҫтарнӑ.
Пакунли пирки каярах ӗҫтешӗсем тӗрӗслев пуҫарнӑ иккен. Унӑн хӑй куҫҫуль пекех тасине сӑмахпа та, хут ҫырса та ӑнлантарма тивнӗ-мӗн. Ӗҫтешӗсен тата тӑванӗсен умӗнче те аванмарланнӑ имӗш.
Митингра пустуйран пакӑлтатнӑ ҫын тӗлӗшпе йӗрке хуралҫи суда ҫитнӗ. Унтисем вара пакунли кӑмӑл-сипет тӗлӗшӗнчен хур тӳснӗ тесе ӑна 10 пин тенкӗ тӳлемелле йышӑну кӑларнӑ.
Ӗнер Чӑваш Ен Элтеперӗ Михаил Игнатьев республикӑн тӗп хулинчен аякра вырнаҫнӑ муниципалитетсенче пулнӑ.
Аса илтерер, хальхи вӑхӑтра районсемпе хуласем иртнӗ ҫулхи ӗҫ-хӗле пӗтӗмлетеҫҫӗ. Пӑрачкав тата Улатӑр районӗсенче, ҫавӑн пекех Улатӑр хулинче ун пек пухусем иртнӗ. Пӗтӗмлетӳллӗ ларуччен Михаил Васильевич вырӑнти муниципалитетрах вӗсен ертӳҫисемпе тата сити-менеджерсемпе тӗл пулнӑ, ӗҫлӗ ыйусене сӳтсе явнӑ.
«Правда ПФО» интернет-хаҫат пӗлтернӗ тӑрӑх, Пӑрачкав салинче отчетлӑ пуху пуҫланиччен 15 минут маларах ҫеҫ суйлав пирки аса илтерекен баннер вырнаҫтарнӑ. Кун пирки вӗсене хӑйсен шанчӑклӑ ҫӑлкуҫӗсем систернӗ имӗш.
«Выбираем будущее» (чӑв. Пуласлӑха суйлатпӑр) баннера васканипе-ши реклама щичӗн пӗр енне ҫеҫ ҫакса хунӑ, щитӑн тепӗр енӗ ҫара тӑрса юлнӑ иккен.
Чӑваш Енри ҫичӗ районти ҫул-йӗре кӑҫалпа килес ҫул «ДорТех» предприяти тытса тӑрӗ. Аукцион пӗтӗмлетӗвӗпе «Правда ПФО» интернет-хаҫат паллаштарнӑ. Аукциона пӗртен-пӗр предприяти хутшӑннӑ-мӗн. Контракт хакӗ — 252,6 млн тенкӗ. Тепӗр майлӑ каласан, ҫул-йӗре тытса тӑма тивӗҫнӗ организацие ик ҫулта хыснаран ҫавӑн чухлӗ укҫа уйӑрӗҫ.
«ДорТех» Улатӑр, Элӗк, Хӗрлӗ Чутай, Муркаш, Пӑрачкав, Ҫӗмӗрле, Етӗрне районӗсенче регион тата муниципалитет пӗлтерӗшлӗ ҫулсемшӗн яваплӑ пулӗ.
«ДорТех» предприятин устав капиталӗн 51 проценчӗ Александр Волков аллинче-мӗн. Вӑл хӑй вӑхӑтӗнче «Чӑвашавтодор» предприятин гендиректорӗ пулнӑччӗ. Ӑна предприяти укҫине вӑрланӑшӑн судпа айӑпласа виҫ ҫуллӑха хупса хумалла тунӑччӗ.
ЧР Ҫутҫанталӑк министерстви кӑҫал Улатӑрта, Улатӑр районӗнчи Кире поселокӗнче, Йӗпреҫ поселокӗнче тата ҫак районти Пӑва ялӗнче пурӑнакансене таса шывпа тивӗҫтерес тесе ҫанӑ тавӑрса ӗҫлеме тытӑнасшӑн. Ҫапла майпа асӑннӑ тӑрӑхсенче тӗпленнӗ ҫынсем виҫӗ ҫул хушшинче таса шывлӑ пулӗҫ.
Йӗпреҫ районӗнче шыв ыйтӑвӗ чӑннипех те ҫивӗч. Аса илтерер: иртнӗ ҫулхи ҫулла унти ҫынсем прокуратурӑна ҫыхав ҫырса пулӑшу ыйтнӑ. Ара, вӗсен килӗнчи кранран тутӑх тӗслӗ шыв юхнӑ. Ҫийӗнчех тӗрӗслев ирттернӗ. Тӗлӗнмелле те, пӑтранчӑк шыв ӗҫме юрӑхлӑ тесе йышӑннӑ. Вӑл ҫын сывлӑхӗпе пурнӑҫӗшӗн хӑрушлӑх кӑларса тӑратмасть-мӗн.
Ҫак тӑрӑхсенче пурӑнакансене таса шывпа тивӗҫтерес тесе республика хыснинчен укҫа уйӑрма палӑртнӑ. 2012–2013 ҫулсенче проектпа смета документацине хатӗрленӗ ӗнтӗ, вӑл патшалӑх экспертизи витӗр тухнӑ.
Паянтанпа Улатӑр хула администрацине ҫӗнӗ ҫын ертсе пырать. Тунтикун, кӑрлачӑн уйӑхӗн 29-мӗшӗнче, иртнӗ хулари Депутатсен пухӑвӗн черетсӗр ларӑвӗнче Юрий Боголюбов тухтӑра хулан сити-менеджерне лартнӑ.
Конкурса малтанласа виҫӗ ҫын хутшӑнни паллӑ. Вырӑнти хула администрацийӗнче кашнинпе уйрӑм калаҫнине ӗнентереҫҫӗ.
Юрий Боголюбов маларах Улатӑр район пульницин тӗп тухтӑрӗнче ӗҫленӗ, хулари Депутатсен пухӑвӗн депутатне суйланнӑ (тунтикунтан вӑл депутат пулма пӑрахнӑ).
Аса илтерер, Улатӑр хулинче раштав уйӑхӗн 19-мӗшӗнче иртнӗ Депутатсен пухӑвӗнче вырӑнти «халӑх тарҫисем» хулан сити-менеджерӗ Александр Герасимов хӑйне ӗҫрен кӑларма ыйтса ҫырнине пӑхса тухнӑччӗ. Унтанпа хула администрацийӗн пуҫлӑхӗн тивӗҫне хула администрацийӗн пуҫлӑхӗн пӗрремӗш ҫумӗ — финанс пайӗн пуҫлӑхӗ Наталья Назарова пурнӑҫланӑччӗ.
Улатӑр районӗнчи пӗр тӑрӑхра сӑмакун аппарачӗ сирпӗннипе ҫын пиҫсе кайнӑ. Ҫак хыпара паян «Хыпар» издательство ҫурчӗн сайтӗнче пӗлтернӗ.
Эрне пуҫланмассерен Чӑваш Ен Элтеперӗ Михаил Игнатьев пуҫлӑхсемпе канашу ирттерет. Хальхинче унта иртсе кайнӑ уяв кунӗсенчи тӑрӑма тишкернӗ. Ҫавна май Инкеклӗ лару-тӑру енӗпе ӗҫлекен патшалӑх комитечӗн ертӳҫи Вениамин Петров ҫак тапхӑрта пулнӑ инкексем пирки каласа кӑтартнӑ.
Уяв кунӗсенче 31 пушар тухнӑ, вутра пӗр ҫын вилнӗ. Пӗлтӗр ҫак тапхӑр 6 ҫын пурнӑҫне татнине шута илсен кӑҫал инкексен шучӗ чакни — ырӑ пулӑм.
Улатӑр районӗнче сӑмакун аппарачӗ сирпӗннипе ҫыннӑн ӳчӗ пиҫсе кайнӑ.
Пиротехникӑпа асӑрханманнипе суранланнӑ тӗслӗхсем те яланхиллех пулнӑ.
Кӑрлач уйӑхӗн 5-мӗшӗнче «Улатӑр – Канаш» маршрутпа ҫӳрекен пуйӑс машинисчӗ полицие шӑнкӑравланӑ. Вӑл чукун ҫул тӑрӑх, Улатӑр районӗнчи Алтышево тата Атрать ялӗсен хушшинче, шортик тата майка ҫеҫ тӑхӑннӑ арҫын утнине пӗлтернӗ.
Полицейскисем вырӑна тӳрех ҫитнӗ. Анчах унта никама та тупайман. Пакунлисемпе ҫӑлавҫӑсем вӑрманта та, юханшыв хӗрринче те шыранӑ. Юнашар ялсенче пурӑнакансем те айккинче юлман – аялти тум вӗҫҫӗн утакан ҫынна шыранӑ.
Темиҫе сехетрен ҫав арҫын камево пулнине палӑртнӑ. Вӑл Атрать поселокӗнче пурӑнакан 23 ҫулти каччӑ пулнӑ. Хайхискер тусӗ патӗнче хӑнара пулнӑ, эрех ӗҫнӗ хыҫҫӑн киле кайма тухнӑ. Вӑл вӑрман хӗррипе темиҫе ҫухрӑм утнӑ, унтан ҫула май машинӑна ларса киле ҫитнӗ. Ирхине вара Мускав облаҫне ларса кайнӑ. Вӑл вахта мелӗпе ӗҫлет-мӗн. Халӗ унӑн сывлӑхӗ хӑрушлӑхра мар.
Юлашки вӑхӑтра Чӑваш Енре икӗ шкул автобусӗ ҫул ҫинче аварие ҫакланни пирки пӗлтернӗччӗ. Улатӑр районӗнче тата Шупашкар хулинче ачасене илсе ҫӳрекен транспорт пӑтӑрмаха ҫакланнӑ. Телее, вӑйлах суранланнисем пулман. Малашне шкул автобусӗсен тӗлӗшпе ушӑну пулӗ.
Улшӑнусем ҫитес ҫулхи утӑ уйӑхӗн 1-мӗшӗнчен вӑя кӗрӗҫ. Шкул автобусӗсен водителӗсен мӗнле ҫӗнӗлӗхсене шута илмелле пулӗ-ха?
Ачасене илсе ҫӳрекен автобусӑн тӑрринче сарӑ е хӗрлӗ сарӑ тӗслӗ маяк пулмалла. Водительсен тӗлӗшпе саккун ҫирӗп пулӗ. Малашне «D» категориллӗ транспортра ҫулталӑкран кая мар стаж пухнӑ водительсем ӗҫлейӗҫ.
Чӑваш Ен шкул автобусӗсемпе ҫыхӑннӑ пӑтӑрмахсене пула Раҫҫей телеканалӗсен эфирне темиҫе хут та лекрӗ. Юлашки уйӑхра кӑна икӗ авари пулчӗ. Паян, раштав уйӑхӗн 25-мӗшӗнче, Шупашкарти Сӗнтӗрвӑрри ҫулӗ ҫинче виҫҫӗмӗш пӑтӑрмаха шута илнӗ. Унта ГАЗель маркӑллӑ шкул автобусӗ ҫӑмӑл машинӑпа ҫапӑннӑ. Хайхи микроавтобусра 11 ҫын пулнӑ, вӗсенчен 9-шӗ — ачасем.
Чӑваш Енӗн сывлӑх сыхлав министерстви пӗлтернипе килӗшӳллӗн, авари хыҫҫӑн ачасене Шупашкарти 2-мӗш ача-пӑча пульницин педиатр тухтӑрӗ тӗрӗсленӗ. Телее, вӗсенчен пӗри те аманман.
Палӑртса хӑвармалла, чӳк уйӑхӗн 28-мӗшӗнче тӗп хулари Трактор тӑвакансен проспектӗнче шкул автобусӗ маршруткӑпа ҫапӑннӑччӗ. Ҫул паман ГАЗель хуҫине 500 тенкӗлӗх штрафланӑ. Иккӗмӗш пӑтӑрмах иртнӗ эрнере Улатӑр районӗнче пулнӑччӗ. Ун чухне шкул автобусӗнче 16 ҫулти хӗрӗн сӑмси хуҫӑлнӑ.
-1.7 °C